Walang inang hindi maghahanap sa kanyang nawawalang anak. Kahit gaano man ito katagal o gaano man ito kahirap. Hindi mawawala sa puso ng inang tulad ko ang pag-asang mahahanap ko si Sherlyn at ang kasama niyang si Karen Empeño at makakamit namin ang katarungan.
Walang inang hindi maghahanap sa kanyang nawawalang anak. Kahit gaano man ito katagal o gaano man ito kahirap. Hindi mawawala sa puso ng inang tulad ko ang pag-asang mahahanap ko si Sherlyn at ang kasama niyang si Karen Empeño at makakamit namin ang katarungan.
Kaya ang araw na ito ay araw ng aming paniningil. Ngayon, sinasampahan namin ng kasong kriminal si Ret. Maj. Gen. Jovito Palparan Jr. at kanyang mga kasama, ang nasa likod ng pagdukot at paglabag sa karapatang pantao ng aking anak.
Dapat managot ang berdugong si Palparan, Lt. Col. Rogelio Boac, Lt. Col. Felipe Anotado, 2nd Lt. Francis Mirabelle Samson, Arnel Enriquez, Donald Caigas at iba pang mga kasama nila sa pagkawala ng aming mga anak. Itanggi man ni Palparan ang kanyang kasalanan, malakas ang ebidensya sa kanyang pananagutan.
Hindi kami natatakot, katulad ng anak kong si Sherlyn na hindi natakot panghawakan at ipaglaban ang kanyang paniniwala. Hindi kami titigil hangga’t makamit namin ang katarungan at mapanagot ang mga may kagagawan sa pagdukot at pambababoy sa aming mga anak.
Ang aking sigaw para sa hustisya ay sigaw ng maraming pang inang nawawalan ng anak, asawa at kapatid.
-Mrs. Linda Cadapan, Ina ng nawawalang si Sherlyn Cadapan
Ako ay isang guro. At bilang guro, itinuturo ko sa mga mag-aaral ang kahalagahan ng pagiging makatao, makabayan, maka-kababaihan at makadiyos. Ngunit paano ito maisasabuhay ng aking mga mag-aaral kung ang tunay na nagaganap sa ating lipunan ay taliwas sa mga ito?
Namamayani sa ating bansa ang mga di-makataong polisiya ng pamahalaan. Dinukot ng mga militar, sila na dapat mga mabuting ehemplo ng mga kabataan, ang aking anak na si Karen Empeno. Kahayupan ang nangyari sa aking anak na babae mula nang siya ay dukutin, tortyurin at itago ni Gen. Jovito Palparan hanggang sa ngayon. Makatao ba ang isang gobyernong hinahayaang mamayani ang kawalang-pananagutan ng mga kriminal?
Paanong naging makabayan ang mga dumukot sa aking anak kung pinaparusahan nila ang mamamayang walang kasalanan? Nasaan ang takot nila sa Diyos kung puro kasalanan sa kapwa ang kanilang ginagawa?
Ngunit patuloy akong magiging makatao, makakababaihan,makabayan at maka-Diyos. Patuloy ko itong ituturo sa mga susunod na henerasyon. Ang pagsasampa ng kasong kriminal kay Gen. Palparan at sa kanyang mga tauhan sa pagdukot at pagtotyur sa aking anak at kay Sherlyn ay isang patunay sa aking tuluy-tuloy na paglaban para sa lipunang makatao at makabayan.
Ito ang aming ambag sa pagtataguyod ng katarungan sa ating bansa at para hindi na ito maulit pa.
-Mrs. Concepcion Empeño, Ina ng nawawalang Karen Empeño